كتبت / صباح جمال الدين
تخيل أنك راكب قطر أو مترو الانفاق وتتفاجي أن عليك مخالفة ورقم كبير وانت مش عارف حاجة عن المخالفة دي، ولازم تدفعها ولا هتتحول لقضية.. يا تري اية هيا غرامات قطارات مترو الانفاق والسكك الحديدية وبتوصل لكام.
في الفترة الاخيرة انتشر كلام كتير عن وسائل التواصل الاجتماعي والمواقع الاخبارية عن تحصيل غرامة 50 جينه من اي مواطن يتاخر في المترو وان صلاحية التذكرة لمدة ساعتين بس وان المواطن إذا تاخر عن الساعتين دول هيتوقع عليه غرامة كبيرة وكلام كتير في الحتة دي لحد ما طلعت وزارة النقل ونفت الكلام ده تماما ووضحت جدول الغرامات اللي ممكن تقع علي الراكب في حال ارتكابه لمخالفة في قطارات السكك الحديدية أو مترو الانفاق.
الهيئة القومية لسكك حديد مصر أعلنت عن الغرامات الموقعة على ركوب القطارات المختلفة للهيئة بدون تذكرة، وقالت ان القرارات دي هدفها المحافظة على مرفق السكة الحديد والحد من حالات التكدس داخل القطارات، وضمان استدامته لخدمة الاجيال اللي جاية وكمان علشان الدولة تقدر تحافظ عليه اطول فترة ممكنة بالاضافة الي استمرار عمليات تحديثه لخدمة المواطنين .
الهيئة القومية لسكك حديد مصر قالت أن غرامة ركوب قطارات تالجو أو قطارات النوم، vip أو القطارات الأسباني والقطر الفرنساوي وقطارات الثالثة المكيفة في حالة ركوب المواطن بدون تذكرة بتوصل لـ 70 جنيهًا.
شركة مترو الانفاق حدد كمان مخالفات علي استخدام تذكرة مخفضة فئات خاصة دون وجه حق زي نصف تذكرة أو تذاكر المعاشات أو تذاكر ذوي الهمم بغرامة 100 جنيه، وفي حالة عبور الراكب من بوابات التذاكر الإلكترونية بدون تذكرة هيدفع غرامة 100 جنيه، وفي حالة استخدام تذكرة في الخروج دون تسجيل دخول هيدفع غرامة 100 جنيه، وفي حال استخدام اشتراك مع صاحبه ومنتهي المدة أو عدد الرحلات هيدفع غرامة 50 جنيها وفي حالة استخدام اشتراك مع غير صاحبه ومنتهي المدة وعدد الرحلات أو غير منتهي هيدفع غرامة50 جنيه وفي حالة استخدام اشتراك لغير صاحبه فئة كبار السن فوق 70 عام هتدفع غرامة 50 جنيه بالإضافة لسحب الاشتراك وإيقافه.
